''Shkëmbimi i territoreve mund të krijojë probleme afatgjate''
Se Gjermania është skeptike lidhur me idenë për shkëmbimin e territoreve mes Kosovës dhe Serbisë, e ripërsëriti sot edhe ambasadori gjerman në Beograd, Thomas Schieb.
Ai ka thënë sot se Gjermania dëshiron një zgjidhje të qëndrueshme mes Prishtinës dhe Beogradit, mirëpo është skeptike sa i përket idesë për shkëmbimin e territoreve, transmeton lajmi.net.
“Ne jemi skeptikë dhe të shqetësuar për idenë e shkëmbimit të territoreve, sepse kjo zgjidhje mund të krijojë probleme edhe më të mëdha afatgjate”, ka thënë Schieb.
Megjithatë, thotë Schieb, Gjermania do ta përkrahë deri në fund procesin e normalimit të raporteve mes Prishtinës dhe Beogradit.
“Ne nuk jemi këtu për t’u treguar se çfarë të bëni, por t’u mbështesim në mënyrë konstruktive”, është shprehur Schieb.
Schieb po ashtu i rikujtoi Serbisë se nuk mund të bëhet pjesë e familjes evropiane pa mbyllur disa kapituj, e ku përshihet edhe dhënia fund e konflikteve të hapura me fqinjët.