6000. Vazhdojmë me Zë

Gazeta “Zëri” sot shënon numrin jubilar të gjashtëmijtë. Këta 6000 numra të gazetës u botuan falë punës së palodhshme të shumë gazetarëve, redaktorëve dhe kontribuuesve të shumtë, të cilët me shkrimet e tyre lanë gjurmë të pashlyeshme në historikun e “Zërit”.
Numri i parë i gazetës së përditshme “Zëri” u nxor disa muaj pas mbarimit të luftës në vend, përkatësisht më 29 dhjetor të vitit 1999.
Përgjatë kësaj periudhe më të shkurtër se dy dekada gazetarët dhe redaktorët e “Zërit” u shpërblyen me dhjetëra çmime vendore dhe ndërkombëtare, duke e dëshmuar kështu profesionalizmin dhe pavarësinë editoriale. 
Kompania mediale “Zëri” përpos gazetës dhe portalit “www.zeri.info” së fundi ka vazhduar me investime të reja në tregun medial të Kosovës, përkatësisht me kanalin informativ “Zëri Tv” dhe me “Radio Prishtinën”.
Pavarësisht këtyre produkteve të reja mediale gazeta “Zëri” do të vazhdojë të mbetet në dispozicion të lexuesve me premtimin se do të jetë zë kritik ndaj të gjithë keqpërdoruesve dhe në mbrojtje të së vërtetës.

Lexo me Zë!