Kaq mijëra euro shpenzuan deputetët për dreka zyrtare
Gazeta “Zëri” ka analizuar shpenzimet që deputetët e Kuvendit i kanë bërë në katër muajt e parë të legjislaturës, me ç'rast shihet se për dreka zyrtare të zgjedhurit e popullit kanë shpenzuar rreth 30 mijë euro.
Sipas shifrave të publikuara del se deputetët e Kuvendit kanë shpenzuar 14 mijë e 834 euro vetëm për vizitat zyrtare jashtë vendit.
Me këtë rast mësohet se mëditjet e tyre nga këto vizita jashtë vendit kapin vlerën prej 13 mijë e 777 eurosh.
LEXO EDHE: Miliona euro për pagat dhe luksin e deputetëve
Përderisa harxhimet për akomodim gjatë udhëtimeve zyrtare shkojnë deri në 9 mijë euro, shpenzimet e tjera gjatë këtyre udhëtimeve, të cilat nuk specifikohen në raport, kapin shifrën prej 1600 eurosh.
Sipas të dhënave në fjalë bëhet e ditur se vlera e mëditjes për vetëm një vizitë jashtë vendit sillet nga 129 deri në 568 euro për individ.
Ndërkohë, gjersa shpenzimet e tjera telefonike në operatorin “Vala” përgjatë këtyre katër muajve kapin shifrën 21 mijë 800 euro, harxhimet e udhëtimeve brenda vendit për 120 deputetët mbërrijnë 2300 euro.
Pos këtyre, deputetët e Parlamentit të Kosovës shpenzuan fiks 29 mijë e 407 euro për dreka zyrtare përgjatë kësaj periudhe kohore.
Por ndonëse po bëhen pesë muaj prejse ka nisur viti 2018, Kuvendi i Kosovës ende nuk ka publikuar asnjë raport financiar për këtë periudhë.
Sekretari i Kuvendit, Ismet Krasniqi, ka thënë për “Zërin” se shpenzimet për tremujorin e parë të këtij viti do të publikohen në uebfaqe pas shqyrtimit të raportit nga Komisioni për Buxhet dhe Financa dhe Kryesia e Kuvendit.
