Bahtiri i kundërpërgjigjet Ismailit
Kryetari i Mitrovicës së Jugut, Agim Bahtiri përmes një komunikate për media i ka reaguar ministrit të Shëndetësisë, Uran Ismajlit, lidhur kërkesën për anulimin e konkursit për drejtorët e spitaleve në Vushtrri dhe në Mitrovicë, shkruan “Zëri.info”.
Në këtë reagim, Bahtiri thotë se ministri Ismaili, nuk e ka demantuar politizimin që i është bërë këtij konkursi me përzgjedhjen e drejtorëve.
Sipas Bahtirit kandidatët e përzgjedhur për drejtorë të këtyre spitaleve janë anëtarë të Partisë Demokratike apo persona të afërt me këtë parti, shkruan tutje “Zëri.info”.
Ja reagimi i plotë i Bahtirit:
E lexova një deklarim të ministrit të Ministrisë së Shëndetësisë, Uran Ismaili, i cili nuk është asgjë më shumë se sa vërtetim i shqetësimit tim dhe të kryetarit të Vushtrrisë, z. Xhafer Tahiri, se PDK po tenton t'i politizoj spitalet e Mitrovicës dhe Vushtrrisë.
Pra, ministri Ismaili në asnjë pjesë të deklarimit të tij nuk e demanton politizimin e spitaleve, por që merret me përhapje të "mjegullës" përmes hapjes së disa temave të tjera.
Sa për informimin e qytetarëve, ministri Ismaili në deklarim është dashur të tregoj dhe të vërtetoj reagimin tonë, se kandidatja e vlerësuar me më së shumti pikë në testin me shkrim për spitalin e Mitrovicës është Mimoza Zeqiri, gruaja e Lulzim Zeqirit, këshilltarit të Kadri Veselit dhe kandidatit të PDK-së për asambleist në Kuvendin e Komunës së Mitrovicës. Ai po ashtu ishte drejtor i Drejtorisë së Inspeksionit në qeverisjen komunale të Mitrovicës 2009-2013 të udhëhequr nga PDK. Znj. Mimoza Zeqiri, është juriste dhe nuk ka përvojë në sistemin shëndetësor.
Po ashtu edhe për konkursin e shpallur për drejtor të Spitalit në Vushtrri, kandidati i vlerësuar me më shumti pikë është Sami Istrefi, asambleist i PDK-së në Kuvendin e Komunës së Vushtrrisë dhe drejtor komunal nga radhët e PDK-së në dy mandatet e kaluara qeverisëse në komunë. Po ashtu, edhe Sami Istrefi është jurist dhe nuk ka përvojë në sistemin shëndetësor.
Se kush po dëshiron politizimin e sistemit shëndetësor, kjo po shihet dhe nuk do koment më shumë.
Edhe sot, sikurse dje, i bëjë thirrje kryeministrit të Qeverisë së Kosovës, presidentit dhe kryetarit të Kuvendit të Kosovës, që t'i ndërmarrin të gjitha masat e nevojshme për anulimin e këtyre dy konkurseve të montuara nga PDK-ja përmes ministrit të Ministrisë së Shëndetësisë. Në të kundërtën, Mitrovica do të reagoj ashpër.
Se a jam unë në shërbim të komunës dhe zbatimit të ligjit, këtë e kanë treguar qytetarët më së miri në vitin 2013 dhe e kanë vërtetuar edhe në vitin 2017.
Prandaj, edhe njëherë ju bëjë thirrje që t'i largoni duart nga politizimi i sistemit shëndetësor, duke iu dhënë mundësi njerëzve profesionistë që ta udhëheqin shëndetësinë e jo atyre që nuk dinë çka është një injeksion apo barnë. /ZERI
