KFOR-i, i gatshëm të ndihmojë në arrestimet e Speciales
Komandanti i KFOR-it, Salvatore Cuoci, gjatë një interviste për gazetën “Zëri” ka deklaruar se nëse është e nevojshme janë të gatshëm t’i ndihmojnë autoritetet kosovare të sigurisë për të kryer arrestime me rastin e ngritjes së aktakuzave nga Gjykata Speciale. Ai ka folur edhe për kërcënimet e mundshme të Rusisë, duke thënë se derisa KFOR-i është në Kosovë çdo agresion ndaj vendit është agresion ndaj NATO-s
Derisa KFOR-i është në Kosovë çdo agresion ndaj vendit është agresion ndaj KFOR-it e ndaj NATO-s.
Kështu ka deklaruar gjatë një interviste për gazetën “Zëri” komandanti i KFOR-it, Salvatore Cuoci, duke komentuar kërcënimet e mundshme të Rusisë në Kosovë e duke i marrë parasysh përplasjet e vazhdueshme të saj me NATO-n.
“Në parim, KFOR-i është NATO dhe derisa KFOR-i të jetë këtu çdo agresion në vend do të jetë një agresion ndaj KFOR-it e ndaj NATO-s gjithashtu. Unë nuk mendoj se do të ketë një kërcënim të drejtpërdrejtë të Rusisë për Kosovën. Mund të kemi një influencë ruse sigurisht, por kjo është pjesë e politikave ndërkombëtare që çdo vend i ndërmerr dhe në thelb momentalisht nuk shohim një kërcënim real nga Rusia në Kosovë”, ka deklaruar Cuoci.
Komandanti i KFOR-it po ashtu është shprehur se forca që ai drejton është e gatshme t’i ndihmojë autoritetet kosovare të sigurisë nëse është e nevojshme për të kryer arrestime në kohën kur do të ngrihen aktakuzat nga Gjykata Speciale.
Sipas tij, KFOR-i është përgjegjës për të ofruar një mjedis të sigurt në vend dhe në rast të ngritjes së aktakuzave, fillimit të arrestimeve, organizimit të ndonjë proteste dhe nëse Policia e Kosovës nuk do të jetë në gjendje të menaxhojë situatën, atëherë KFOR-i është i gatshëm të ndërhyjë.
“Në rastet e tilla ne jemi të gatshëm të ndërhyjmë, pasi kjo është pjesë e misionit tonë”, ka thënë mes tjerash Cuoci.
I pari i KFOR-it gjatë kësaj interviste për “Zërin” ka folur edhe për arrestimin e shefit të Zyrës Serbe për Kosovën, Marko Gjuriq, duke thënë se ka mundur të shmangej brutaliteti i Policisë, ka komentuar rrezikun nga armatosja e Serbisë, për qendrën ruse në Nish, për transformimin e FSK-së në Forca të Armatosura, si dhe për idenë e shkëmbimit të territoreve mes Kosovës dhe Serbisë.
Zëri: Z. Cuoci, si e vlerësoni situatën e sigurisë në Kosovë?
Cuoci: Kosova është përmirësuar shumë në aspektin e sigurisë dhe institucionet në vend po e mbajnë nën kontroll situatën. Duhet të vlerësojmë se situata është e qëndrueshme, por ende e brishtë për shkak të sfidave që kemi.
Zëri: Po thoni e brishtë?
Cuoci: Po e brishtë.
Zëri: Pse?
Cuoci: Kjo do të thotë se janë disa sfida që mund ta cenojnë gjendjen e sigurisë, kështu që stabiliteti i cili është arritur shumë shpejt mund të marrë kahe tjetër. Kjo është arsyeja pse KFOR-i është ende i nevojshëm këtu dhe kjo është kryesisht arsyeja pse ne jemi duke u kujdesur për situatën këtu.
Zëri: Si është situata e sigurisë në veri të Kosovës, sidomos pas vrasjes së Ivanoviqit a e ka rritur KFOR-i prezencën atje?
Cuoci: KFOR-i është i pranishëm në tërë Kosovën dhe natyrisht që kemi rritur praninë tonë atje. Ne jemi duke siguruar lirinë e lëvizjes, të stabilitetit dhe mjedise të sigurta në tërë Kosovën. Por ajo që është e rëndësishme është që të merret parasysh se KFOR-i është reaguesi i tretë. Pra, Policia e Kosovës është reaguesi i parë, kemi EULEX-in si reaguesin e dytë dhe më në fund kemi KFOR-in si reaguesin e tretë. Pra KFOR-i është një forcë e cila është këtu në Kosovë dhe e cila ka të bëjë me sigurinë e Kosovës, por në thelb institucionet në Kosovë janë përmirësuar në mënyrë që ta mbajnë situatën nën kontroll dhe kanë aftësi që të kujdesen për situatën. Nëse marrim parasysh vetëm numrin e rasteve sa herë KFOR-it i është kërkuar të ndërhyjë, ato ishin shumë pak raste në vitin e kaluar dhe kjo është një shenjë e mirë që situata po përmirësohet dhe gjithashtu institucionet në Kosovë janë përmirësuar dukshëm e po kujdesen për situatën.
Zëri: Cili është bashkëpunimi i KFOR-it me Policinë e Kosovës, sidomos në rastet e intervenimeve në veri?
Cuoci: Policia e Kosovës është e pranishme në veri, ka stacionin e vet policor në veri, kështu që ata janë plotësisht të vetëdijshëm për situatën dhe e kanë marrë përsipër menaxhimin e situatës. Nëse nuk janë në gjendje ta bëjnë një gjë të tillë, mund të kërkojnë ndërhyrjen e EULEX-it dhe pastaj KFOR-i mund të ndërhyjë gjithashtu. Pra, është e rëndësishme që t’i sigurojmë këta tre hapa, sepse këta tre hapa lidhen me detyrën që kemi. Nëse problemi është një problem ushtarak, sigurisht është aty KFOR-i. Ne do të jemi në gjendje të menaxhojmë me probleme ushtarake, por kur bëhet fjalë për problemin e sigurisë, natyrisht që kemi Policinë e Kosovës, EULEX-in dhe pastaj KFOR-in.
Zëri: A keni qenë të njoftuar nga Policia e Kosovës për rastin e arrestimit të Marko Gjuriqit?
Cuoci: Po, ne e ndoqëm situatën dhe ishim të gatshëm për të ndërhyrë. Ne prisnim që kjo mund të ndodhte, por në çdo rast ishim pas ngjarjes. Ne ishim në bashkëpunim të ngushtë dhe në kontakt me Policinë e Kosovës për të menaxhuar situatën dhe për të qenë i sinqertë me ministrin e Brendshëm, në mënyrë që të shmangej çdo lloj përshkallëzimi. Unë gjithashtu po përpiqesha të kisha një kontakt me palën serbe për të njëjtën arsye dhe në thelb kjo është pjesë e punës sime, kështu që kur diçka mund të eskalojë, detyra ime është të përpiqem ta qetësojë situatën për të shmangur një përshkallëzim të mundshëm.
Arrestimi i Gjuriqit, ka mundur të shmangej brutaliteti i Policisë
Zëri: A ka pasur ndonjë rrezik për përshkallëzim?
Cuoci: Në thelb kishim disa njerëz, ka mundur që situata të ndryshojë menjëherë, por njerëzit ishin të qetë dhe pastaj u shpërndanë. Kështu që kjo është një shenjë e mirë e pjekurisë për të shmangur çdo lloj përshkallëzimi. Kishte disa bllokime të rrugëve dhe pasi jemi marrë me njerëzit që qëndronin pas bllokadave, ata pranuan për t’i hequr pengesat rrugore. Kështu që unë mendoj se kjo ishte një histori e suksesshme, edhe pse arrestimi ishte diçka për të cilën mund të flasim, mund të vlerësojmë se ndoshta ka mundur të shmanget forca brutale e Policisë së Kosovës. Por në të njëjtën kohë, pavarësisht faktit se arrestimi u zhvillua në mënyrën se si është kryer arrestimi, ndërhynë pas arrestimit të gjithë anëtarët e bashkësisë ndërkombëtare, gjë që ishte shumë e rëndësishme, sepse ndikoi që situata të mos tensionohej dhe gjithashtu të eliminohet çdo lloj rreziku i mundshëm për cenimin e stabilitetit të brishtë siç kemi përmendur në fillim.
Zëri: Komandant, ju thoni për të shmangur forcën brutale. Si të shmanget ajo kur z. Gjuriq nuk e respekton lejen e autoriteteve vendore për të hyrë në Kosovë?
Cuoci: Pra, ky është një fakt që duhet të vërtetohet nëse Marko Gjuriq ka shkelur ligjin ose jo. Nëse ky është rasti dhe ai u arrestua për këtë arsye, pyetja ishte, a ishte me të vërtetë e nevojshme për një përdorim të tillë të forcës nga Policia që ta arrestonte Gjuriqin, kështu që kjo është çështja kryesore dhe është diçka që duhet të kihet parasysh në të ardhmen. Nuk po kritikoj atë që ka ndodhur, por po them se nëse ka diçka që po ndodh është më mirë se kurrë një reagim i mirë, mënyra e drejtë e reagimit e krahasuar me kërcënimin me të cilin ballafaqoheni. Në thelb ishte diçka që ndodhi, reagimi i Policisë ishte nën vëzhgimin e të gjithëve sepse të gjithë e shihnin atë që po ndodhte dhe në thelb unë jam shumë i lumtur që institucionet e Kosovës krijuan një Komision të Brendshëm për të vlerësuar se çfarë ndodhi dhe nëse sjellja e Policisë ishte korrekte në atë rast.
Zëri: Ju mendoni që arrestimi nuk ishte veprim i duhur nga Policia?
Cuoci: Jo reagimi, por mënyra. Kështu që do të vlerësohet nga komisioni i posaçëm që po heton atë dhe unë e perceptoj e mund të them se kjo është një shenjë e mirë, një shenjë e mirë për pjekurinë e plotë të institucioneve të Kosovës për të hetuar rastin që ndodhi dhe të zbulohet nëse përdorimi i forcës ishte me të vërtetë e nevojshme dhe në mënyrën e duhur për të shmangur ndoshta nëse diçka ishte e gabuar, e cila mund të ndodhë përsëri në të ardhmen. Kështu që në mendjen time, nga këndvështrimi im, kjo është edhe një shenjë e mirë për të ecur përpara dhe për ta prezantuar këtë vend si një vend që është i përgatitur për t'u bashkuar me bashkësinë ndërkombëtare, i cili është edhe qëllimi. Edhe nganjëherë kur bëjmë gabime duhet pasur vullnetin për të hetuar dhe ta marrim mësime nga gabimet. Kjo është diçka që do të ndihmojë shtetin të rritet dhe të tregojë pjekuri edhe me bashkësinë ndërkombëtare. Kjo është diçka që duhet pasur në konsideratë, natyrisht që duhet të shmangim gjithashtu që një gjë e tillë të mundë të ndodhë përsëri, kështu është e rëndësishme që të ketë një rishikim të brendshëm dhe me rishikimin e brendshëm mund të mësojmë dhe të shmangim situata të ngjashme. Nëse çdo gjë ishte korrekte, atëherë duhet të ketë justifikim, të vërtetohet se gjithçka ishte e korrekte. Por në parim është e rëndësishme të bëhet ky shqyrtim dhe të vlerësohet nëse çdo gjë ishte në mënyrën e duhur dhe nëse ka mundur të ndërmerrej në mënyrë të ndryshme për të përmirësuar kapacitetin e Policisë.
Çdo sulm ndaj Kosovës është sulm ndaj NATO-s
Zëri: A është e kërcënuar Kosova nga jashtë, përkatësisht si e shihni rrezikun nga Rusia pas përplasjeve të vazhdueshme me NATO-n?
Cuoci: NATO-ja është këtu. Në parim KFOR-i është NATO dhe derisa KFOR-i të jetë këtu çdo agresion në vend do të jetë një agresion ndaj KFOR-it e ndaj NATO-s gjithashtu. Unë nuk mendoj se do të ketë një kërcënim të drejtpërdrejtë për Kosovën. Mund të kemi një influencë ruse sigurisht, por kjo është pjesë e politikave ndërkombëtare që çdo vend i ndërmerr dhe në thelb momentalisht nuk shohim një kërcënim real nga Rusia në Kosovë. Nëse kjo do të ndodhë sigurisht që KFOR-i është këtu dhe ne do të kujdesemi edhe për këtë, si dhe NATO-ja do të kujdeset për këtë.
Zëri: A ka ndonjë prani ruse në veri?
Cuoci: E dimë se lidhja midis Serbisë dhe Rusisë është rritur, por Serbia ka deklaruar neutralitetin e saj dhe në mënyrë të njëjtë sillen si me Rusinë, ashtu edhe me NATO-n dhe ne e respektojmë këtë. Dua të them se secili vend mundet absolutisht të zgjedhë partnerët e tyre, por momentalisht nuk mendojmë se kjo prani ose kjo rritje e raporteve mes tyre do ta pengojnë procesin këtu në Ballkan. Ne mendojmë se rrugët e vendeve të Ballkanit shpien drejt NATO-s dhe në thelb kjo është ajo që po ndodh. Në qoftë se ne shohim Malin e Zi si një vend kufitar, ashtu siç ishte rasti për Shqipërinë dhe do të jetë për IRJM-në (Maqedoninë) dhe kjo është gjithashtu një rrugë për Kosovën dhe do të kemi një kohë në të cilën gjithashtu Kosova do t’i arrijë të gjitha rezultatet për t'u bashkuar me institucionet perëndimore.
Zëri: A e shihni si rrezik ekzistencën e qendrës ruse në Nish të Serbisë?
Cuoci: Momentalisht qendra në Nish është një qendër humanitare, kështu që derisa situata të mbetet në këtë mënyrë është diçka që do të jetë një ndihmë për popullin e Serbisë, është diçka për trajnimin e zjarrfikësve dhe të operacioneve të shpëtim-kërkimit dhe të organizatave të tjera për mbrojtjen civile. Nëse qendra do të prodhojë diçka ndryshe, natyrisht që NATO-ja do ta monitorojë situatën dhe derisa kjo situatë nuk do të ndikojë në rajon ose në vendet e tjera, nëse nuk paraqet kërcënim nuk ka fare problem. Pra, qendra në Nish është një bashkëpunim që Serbia ka me Rusinë e që ne e respektojmë dhe në thelb është diçka që ne po e monitorojmë, por derisa kjo qendër humanitare të mbetet e tillë nuk do të ketë problem fare.
Zëri: Por autoritetet amerikane dyshojnë se kjo është vetëm qendër humanitare?
Cuoci: E mirë, kjo është diçka që natyrisht duhet të dëshmohet nga pala serbe se e drejta për të strehuar këtë qendër është realitet. Kështu që në thelb nuk mund të konsiderojmë kërcënim diçka që nuk e shfaq veten si një kërcënim. Aktualisht, gjithçka është nën kontroll dhe unë do të thosha se nuk kemi asnjë çështje me qendrën, duke përfshirë faktin se ne si KFOR jemi në Kosovë, kështu që nuk kemi kontakt me atë qendër, me stafin rus që është atje dhe ne nuk kemi problem deri më tani me këtë.
Zëri: Çfarë bashkëpunimi keni me autoritetet e Mbrojtjes së Serbisë, sidomos në pjesën veriore?
Cuoci: Në mandatin e KFOR-it ekziston edhe nevoja për të bashkëpunuar me vendet kufitare me Ministrinë e Mbrojtjes, me shefin e Mbrojtjes së vendeve kufitare të Kosovës dhe në thelb COM-KFOR-i ka takime të ndryshme që do të thosha në baza të rregullta me ministritë e Mbrojtjes dhe me shefat e Mbrojtjes së këtyre vendeve, duke përfshirë Serbinë. Kam takuar rregullisht shefin e Mbrojtjes së Serbisë, kam takuar rregullisht edhe shefin e Mbrojtjes së Ministrisë së Maqedonisë, të Shqipërisë dhe të Malit të Zi, kështu që kjo është pjesë e punës sime dhe në thelb është një domosdoshmëri edhe për t’i rritur marrëdhëniet mes KFOR-it e këtyre vendeve dhe gjithashtu për të rritur bashkëpunimin ushtarak. Shqipëria tashmë kontribuon në KFOR, është një anëtare kontribuuese, anëtare e vendit që do të ketë dhe ka ushtarët e vet në KFOR. Mali i Zi shpresoj se së shpejti do të bashkohet edhe me KFOR-in, kështu që do të jetë vendi i 29-të brenda KFOR-it, kurse me Serbinë edhe ne patrullojmë vijën kufitare administrative. Kjo është diçka që është pjesë e marrëveshjes, është pjesë e dalë nga Rezoluta 1244 dhe në thelb është pjesë e punës sonë. Pra, ballafaqimi me këto subjekte është pjesë e detyrave të përditshme dhe në thelb duhet të konfirmojmë se ne kemi takime të rregullta në nivel të lartë, në nivel teknik dhe madje edhe në terren, sepse ne patrullojmë me Policinë e Kosovës, me Policinë Kufitare të Kosovës dhe ne patrullojnë edhe me forcat e armatosura serbe.
S’ka rrezik nga armatosja e Serbisë
Zëri: Së fundmi është raportuar se Serbia po armatoset me avionë luftarakë. A shihni ndonjë rrezik nga furnizimi me armatim të tillë?
Cuoci: Aspak. Nëse Serbia rinovon flotën e saj dhe ata ripërtërijnë avionët e tyre kjo është pjesë e modernizimit që secila ushtri ose çdo forcë e armatosur nga secili vend mund ta bëjë. Prandaj nuk ka asnjë dilemë pasi ata tashmë kanë avionë dhe fakti që ata kanë modernizuar disa avionë nuk do të thotë se ata do të ndryshojnë qëndrim. Kështu që nuk do të them se ky është kërcënim i vërtetë sepse edhe Serbia ka të drejtën e avancimit të ushtrisë së tyre gjithashtu për t’i rinovuar forcat e tyre të armatosura dhe në thelb kur kanë fluturuar në afërsi të kufirit fluturimet ishin kryer sipas rregullave. Nuk kishte asnjë fluturim mbi Kosovë, çdo gjë është respektuar dhe kështu që ne nuk shohim ndonjë kërcënim në aspektin e modernizimit që çdo vend mund ta bëjë.
Transformimi i FSK-së nëpërmjet ndryshimeve kushtetuese
Zëri: Le të flasim për FSK-në. A është e gatshme FSK-ja të transformohet në ushtri të Kosovës dhe a e përkrah KFOR-i një nismë të tillë?
Cuoci: Meqë FSK-ja është shumë e aftë në kuadër të këtij mandati aktual dhe mandati i tyre aktual është një çështje që ka të bëjë me fatkeqësitë natyrore dhe të mbrojtjes civile, deminim dhe çdo gjë që është vërtet e lidhur me katastrofën civile, për të qenë i sinqertë unë kam parë se aftësitë e tyre inxhinierike dhe aftësitë në përballimin e fatkeqësive natyrore janë shumë të larta. Pra FSK-ja është një organizatë plotësisht e aftë për të menaxhuar çdolloj fatkeqësie natyrore që mund të ndodhë këtu në Kosovë. Ata u vendosën edhe në Shqipëri në fund të vitit të kaluar, ku pas përmbytjeve atje rindërtuan disa ura, prandaj po e mbështesim këtë proces. Kështu që po e përkrahim mandatin e FSK-së, po e mbështesim atë që FSK-ja po bën nën mandatin e saj dhe po mbajmë stërvitje të përbashkëta. Stërvitja e fundit që kemi ekzekutuar së bashku ishte "Shigjeta e Argjendtë", një ushtrim i ndërlikuar i planifikimit dhe gjithashtu e lidhur me disa stërvitje që mund të kryhen në terren. Pra këtë herë ne e ndryshuam plotësisht stërvitjen dhe ajo që bëmë ishte të përfshinim më shumë organizata duke filluar nga Këshilli i Sigurisë së Kosovës, organizata të tjera të ngjashme si FSK-ja, Policia e Kosovës vetëm për t'i lejuar ata të menaxhojnë dhe të shohin se si është të menaxhohen rastet e fatkeqësive natyrore dhe pas kësaj ushtrimi që u zhvillua në terren, i cili ishte krejtësisht ndryshe nga ato të mëparshmet, sepse në thelb ushtrimi u krye tërësisht nga Organizata e Sigurisë së Kosovës. Pra kishim Policinë e Kosovës, zjarrfikësit lokalë dhe zjarrfikësit rajonalë, pastaj aty ishte FSK-ja, kështu që kishim kaq shumë institucione që merreshin të gjithë së bashku, por ato ishin kryesisht nga pala kosovare dhe prania e KFOR-it ishte thjesht monitorim, prani shumë e lehtë. Ushtrimi kësaj radhe është bërë kryesisht nga Organizata e Sigurisë së Kosovës që do të thotë se Kosova është përmirësuar shumë edhe në menaxhimin me fatkeqësitë natyrore, ne jemi shumë të lumtur për këtë. Nëse po flasim për transformimin e FSK-së në Forcat e Armatosura në thelb kjo është zgjedhja juaj, është një zgjedhje që ky vend duhet të marrë dhe sigurisht NATO-ja është shumë e qartë për këtë. Ne nuk kemi asgjë për të shtuar për transformimin, ne duam të bëhet me ndryshimet kushtetuese, kështu që do të thotë që nëse do të bëhet transformimi ose tranzicioni, NATO-ja po kërkon, kjo ishte deklarata e Jens Stoltenbergut, se kjo duhet të ndodhë me ndryshimet kushtetuese.
Ushtria është serioze, s’mund të bëhet me deklarata
Zëri: Si të formohet ushtria e Kosovës nëpërmjet ndryshimeve kushtetuese kur ka kundërshtime të mëdha nga Lista Serbe dhe nga qeveria e Serbisë?
Cuoci: Kjo është diçka që duhet të zgjidhet mirë brenda vendit, pasi që një ushtri është diçka serioze, nuk është diçka që do të arrini me deklarata. Ushtria kërkon kohë, duhen vite dhe sigurisht është një proces që duhet të diskutohet në mesin e popullatës. Pra, Kosova duhet të vendosë nëse dëshiron ta ketë ushtrinë e vet, nëse ka nevojë për të, nëse ka nevojë për një të tillë dhe sigurisht që ky vendim duhet të ndahet mes njerëzve. Nuk është e lehtë sipas të kaluarës së këtij vendi që të ketë një vendim të përbashkët, por kjo është një shenjë e pjekurisë së mirë dhe mendoj se institucionet në Kosovë duhet të punojnë për t’i arritur edhe këto rezultate.
Zëri: Por nëse Qeveria vendos që transformimi të mos ndodhë nëpërmjet ndryshimeve kushtetuese?
Cuoci: Kjo është një zgjedhje nga Qeveria. Institucionet në Kosovë thjesht mund të marrin vendime, por ne do të shohim gjithashtu se çfarë do të ishte qëndrimi i NATO-s. Pra NATO-ja dhe z. Stoltenberg ishin shumë të qartë për ta bërë këtë transformim nën ndryshime kushtetuese, nëse do të jesh ndryshe, nëse do të ndodhë, do ta shqyrtojmë edhe qëndrimin tonë dhe do të shohim se cili do të jetë vendimi nga NATO-ja, domethënë nga Brukseli dhe nga kombet që janë në Bruksel.
Zëri: Është thënë se shumë shpejt mund të nisin arrestimet e para nga Gjykata Speciale. A do t’i asistojë KFOR-i autoritetet e sigurisë vendore nëse është e nevojshme për të kryer arrestime?
Cuoci: Ne nuk e dimë se kur Gjykata e Specializuar do të fillojë me ndjekje penale, kjo është diçka që vendos Gjykata dhe askush tjetër nuk mund të vendosë kur fillojnë me aktakuzat. Mirëpo, sigurisht që duke qenë KFOR-i si reaguesi i tretë, nëse Policia e Kosovës ose institucionet në Kosovë do të kenë nevojë për ndihmën tonë në atë që kalon nëpër zinxhirin e përgjegjësive, për ne si reagues i tretë, në rregull, ne do të luajmë rol edhe në këtë.
Zëri: Jeni gati të ndihmoni?
Cuoci: Po, sepse kjo është një pjesë e asaj që po bëjmë. Në thelb ne jemi të përgjegjës për një mjedis të sigurt, kështu që sa i përket arrestimeve, çfarë do të ndodhë me aktakuzat, kur do të ketë ndonjë arrestim ose në rast se do të ketë ndonjë lloj proteste dhe Policia e Kosovës nuk do të jetë në gjendje të menaxhojë me këtë situatë, sigurisht KFOR-i është gjithashtu i gatshëm të ndërhyjë, sepse kjo është edhe pjesë e misionit tonë. Ne do të sigurojmë lirinë e lëvizjes dhe mjedisin e sigurt, duke u përpjekur të shmangim çdolloj përshkallëzimi që synohet për të parandaluar këto lloj arrestimesh dhe në thelb do të përpiqemi të vazhdojmë të ofrojmë sigurinë për të gjithë qytetarët e Kosovës.
Shkëmbimi i territoreve, kthim në vitet e ’90-ta
Zëri: Derisa dialogu po shkon drejt fundit në opinion janë përmendur mundësitë e shkëmbimit të territoreve mes Serbisë dhe Kosovës. A mund të ketë pasoja në Ballkan një shkëmbim i tillë?
Cuoci: Përgjigjja është e qartë, në thelb dikush ka folur ose ka idenë se ndarja mund të jetë një zgjidhje për Kosovën. Sidoqoftë, kjo mbështetet në vendimin e kombeve në radhë të parë, kombit që përfshihet në proces dhe atëherë është e nevojshme përfshirja e bashkësisë ndërkombëtare. Ky është mendimi im personal, por duke marrë parasysh historinë e Ballkanit nëse rifillojmë me idenë dhe me planet e mureve, ose shkëmbim territoresh, ose të ndarjes, siç ishte ideja fillestare, një gjë e tillë mund të shkaktojë një situatë tjetër rreth ballkanasve dhe ne kemi vende të tjera të Ballkanit që ata kanë të njëjtat probleme. Kështu që nëse do të fillonim përsëri me këtë proces, ndiej se i gjithë rajoni i Ballkanit do të jetë edhe një herë në të njëjtën situatë të asaj 20-25 vjet më parë dhe unë nuk mendoj se kjo është e përshtatshme për stabilitetin e rajonit që të rifillojë me këtë proces. Edhe një herë ky është vetëm mendimi im personal dhe mendoj se kjo bazohet në faktin se në realitet duhet të merret vendimi mes institucionit dhe qeverive, si dhe vendet që janë të përfshira në këtë proces. Unë mendoj se bashkësia ndërkombëtare duhet të shohë atë që është përfundimtare. Dialogu është mënyra kryesore për të arritur një marrëveshje dhe unë do të sugjeroja që të bëhen të gjitha përpjekjet për të marrë një vendim përfundimtar mbi dialogun për të ecur përpara dhe të rezultojë me një të ardhme më të mirë për qytetarët e Kosovës dhe edhe qytetarët e Serbisë, që do të çojë në një të ardhme më të mirë për të gjithë, arsimim më të mirë dhe gjithashtu mundësinë për t’u bashkuar me institucionet perëndimore dhe kjo është diçka që ky popull e meriton. Ne duhet të mendojmë rrugën për të finalizuar dialogun, sepse dialogu është një mundësi për të siguruar një të ardhme më të mirë për këtë vend dhe të gjitha përpjekjet duhet të bëhen në këtë drejtim duke shpresuar që kjo të ndodhë shumë shpejt.
