VV kundërshton platformën, LDK ndërton qëndrim
Derisa Vetëvendosja e kundërshton platformën qeveritare për dialogun, LDK-ja thotë se do dalë me qëndrim përt të.
“Është një dokument komplet joserioz, komplet i papranueshëm, edhe në aspektin politik, edhe kushtetues për faktin se tashmë është bërë kohë e gjatë prejse ka nisur procesi i dialogut me Serbinë dhe ne nuk kemi parë që nga ky dialog me Serbinë ka përfituar Kosova”, tha deputetja e Vetëvendosjes Albulena Haxhiu për rtv21.tv.
Ajo konstatoi se duhet të ketë dialog të brendshëm për dialogun e Brukselit.
“Së pari duhet të ketë një dialog të brendshëm se çfarë dialogu duam, pra për dialogun e jashtëm”, tha Haxhiu.
Edhe Ismet Beqiri, sekreetari i përgjithshëm i LDK-së komentoi për rtv21.tv platformën e Qeverisë së Kosovës për dialogun.
“Thjesht janë përsëritje të disa gjërave, realisht na i kishin caktu detyrat si Kuvend se çka me ba dhe nuk pashë diçka që ia vlen të thuhet edhe për të përshëndetur”, tha Beqiri.
Ai tregoi se LDK-ja do të ketë qëndrim për këtë platformë.
“Ne do të marrim një qëndrim të qartë, si do të sillemi, çfarë do të veprojmë”, tha Beqiri.
Sot edhe Marko Gjuriq, shef i Zyrës për Kosovën në Qeverinë e Serbisë e komentoi platformën qeveritare kosovare për dialogun e Brukselit.
“Nëse paraprakisht e çimentoni qëndrimin tuaj, shtrohet pyetja se cila është mundësia që të bëhet diçka”, tha Gjuriq për televizionin publik serb RTS.
Qeveria e Kosovës të enten paraqiti platformën për dialogun me Serbinë në Bruksel. /21Media
