Sirianët kërkojnë azil në Shqipëri

Aktuale April 14, 2018 - 16:00
Lexo detajet

Sirianët që i shpëtojnë luftës, e cila po zgjat prej gati 7 vjetësh janë të shpërndarë anë e mbanë botës. Një pjesë e tyre kalojnë nëpër Shqipëri dhe si destinacion kanë vendet e BE-së.

Por rreth 100 siriane kanë kërkuar azil politik në Shqipëri. Ata nuk duan të kthehen në Vendlindje dhe nuk janë informuar mbi zhvillimet e fundit atje.

LEXO EDHE: Nisin sulmet në Siri, reagon ashpër Moska

Më shumë se 100 shtetas sirian që kanë hyrë në Shqipëri ilegalisht kanë kërkuar azil. Ata janë akomoduar në Qendrën Kombëtare Pritëse të Azilkërkuesve në Babrru.

Amiri është një 17-vjeçar sirian që ka emigruar së bashku me familjen për t’i shpëtuar luftës në vendin e tij. Ai ka kaluar disa shtete deri sa ka mbërritur në Shqipëri.

“Unë jam nga Siria, nga Alepo, fillimisht kemi shkuar në Libi, më pas në Turqi. Nga Turqia në Greqi dhe më pas në Shqipëri. Këtu gjithçka është mirë, policia është mirë, në Gjirokastër grupe me familje siriane ndihmohen për t’u sjellë këtu me ushqime e gjithçka”, tha Amiri.

17 vjeçari nuk është informuar për zhvillimet më të fundit në Siri, bombardimin e Shteteve të Bashkuara të Amerikës, Britanisë së Madhe dhe Francës ndaj objekteve të armëve kimike. Amiri, si shumë siriane që kanë shpëtuar luftës, nuk dëshiron të kthehet më në vendin e tij.

LEXO EDHE: Bashar Al-Assad bashkon forcat me Iranin, pas bombardimeve të SHBA’së në Siri

Por në kampin e azilkërkuesve në Babrru i rikonstruktuar së fundmi, qëndrojnë edhe shtetas të huaj të tjerë.

“Kam 3 ditë që kam ardhur në Shqipëri, nga Omani kam shkuar në Arabi Saudite më pas në Turqi dhe më pas kam ardhur në Shqipëri”, shprehet një tjetër azilkërkues.

Çdo ditë në pikat kufitare të Shqipërisë, nga kufiri i gjelbër tentojnë të hyjnë shtetas sirianë, apo nga vende të tjera në konflikt, të cilët synojnë emigrimin në vendet e BE-së për një jetë më të mirë.  /Tch/