Në Vetëvendosje anëtarësohen dy mijë persona për tre muaj

Kryetari i Lëvizjes Vetëvendosje, Albin Kurti dhe sekretari organizativ i kësaj partie, Ismajl Kurteshi kanë mbajtur sot mbledhje me kryetarët dhe koordinatorët e qendrave të VV-së.

Sipas komunikatës së lëshuar nga VV, vetëm për tre muajt e fundit janë anëtarësuar mbi dy mijë persona në këtë subjekt politik.

“Në mbledhje u diskutua për gjendjen organizative në Lëvizjen VETËVENDOSJE!, me theks të veçantë në situatën në strukturat e Qendrave. Drejtuesit anembanë Kosovës dhe ata nga mërgata paraqitën të arriturat dhe sfidat në planet dhe punët e Qendrave me ç’rast u potencua rëndësia e iniciativës dhe mbikëqyrjes. Të gjitha Qendrat e Lëvizjes janë të angazhuara në zgjerimin e strukturave të tyre, duke formuar Pika të reja dhe duke i shtuar radhët me anëtarë të rinj. Kështu, nga informatat që vijnë nga terreni, ka një trend pozitiv dhe inkurajues: në tre muajt e fundit, pra në vitin 2018, ka mbi dy mijë anëtarësime të reja në Lëvizjen Vetëvendosjes”.

“Kryetari, Albin Kurti, i njoftoi përfaqësuesit e Qendrave me zhvillimet politike në vend, duke iu referuar posaçërisht ngjarjeve të javës së fundit, dhe qëndrimeve të Lëvizjes VETËVENDOSJE! përkitazi me to. Arrestimi e lirimi i Gjuriqit, tubimi inicues në veri për ringjalljen e ‘Zajednicës’, dërgimi në Gjykatë Kushtetuese i marrëveshjes për ‘Demarkacionin’ me Malin e Zi, dhe, dëbimi i paligjshëm e tinëz i gjashtë shtetasve të Turqisë, ishin tema të diskutimit në këtë mbledhje të radhës të kryetarit dhe sekretarit organizativ me Qendrat”, thuhet në njoftimin e VV-së.