Përmbytet Klina, mobilizohet Komuna
Pas reshjeve të pandërprere të shiut, në lumenjtë dhe përroskat e Klinës, është rritur dukshëm niveli i ujit, por nuk është raportuar për përmbytje në shtëpi banimi.
Kështu ka bërë të ditur Komuna e Klinës e cila së bashku me Policinë e Kosovës është mobilizuar në rast të përmbytjeve.
Kryetari i Komunës së Klinës, Zenun Elezaj, i cili ka pasur një takim me Komandantin e Stacionit të Policisë në Klinë, toger Rexhë Berisha, ka treguar se janë marrë të gjitha masat e nevojshme në rast të vërshimeve.
Ndërsa, Ibër Elezaj, drejtor i Shërbimeve Publike dhe Emergjente, njofton se kanë qenë në terren dhe përveç vërshimeve në tokat bujqësore nuk ka përmbytje në shtëpi të banimit.
“ Jemi në gjendje gatishmërie. Situata është në kontroll”, tha Elezaj.
Sipas tij, ekipet komunale kanë intervenuar në fshatin Zajm të Klinës, afër tregut të bagëtive, në hapjen e kanaleve dhe vendosjen e zhavorrit për të parandaluar vërshimet e mundshme.
Në fshatin Jashanicë të Epërme të Klinës, raportohet se uji nga përroska ka dalë mbi urë dhe ka vështirësuar qarkullimin e automjeteve në atë pjesë. Ekipet komunale janë në terren dhe janë duke vëzhguar situatën
