Tërheqje “taktike” nga shfuqizimi i Speciales

Aktuale January 19, 2018 - 08:09

Deputetët e PDK-së nuk dëshirojnë të flasin nëse ende qëndrojnë prapa iniciativës për shfuqizimin e Ligjit për Gjykatën Speciale, sidomos pas deklarimit të kreut të partisë Kadri Veseli se ky institucion ndërkombëtar i drejtësisë nuk duhet të ndalet. “Nuk kam ndonjë informacion dhe nuk kemi pasur asnjë takim. I kam dhënë disa prononcime dhe s’dua ta riaktualizoj këtë punë”, ka thënë  deputeti i këtij subjekti politik, Zenun Pajaziti, shkruan sot Gazeta 'Zeri'.

Ndërsa bashkëpartiaku i këtij të fundit, deputeti Bekim Haxhiu, ka refuzuar që të përgjigjet në pyetjet e gazetës “Zëri” rreth kësaj gjykate. Ai deklaroi se nuk dëshiron të prononcohet për këtë çështje. “Nuk dua të prononcohem”, ka thënë shkurt Haxhiu.

Njëjtë ka vepruar edhe deputeti tjetër i PDK-së Mërgim Lushtaku, i cili me të kuptuar temën nuk ka dashur të flasë.

Gazeta “Zëri” ka provuar të bisedojë edhe me deputetët Nait Hasanin, Nezir Çoçajn dhe Xhevahire Izmakun, por edhe këta të fundit kanë refuzuar të flasin, duke e mbyllur telefonin vazhdimisht, shkruan Zeri.

Derisa deputetët e PDK-së nuk deklarohen për këtë çështje, deputeti i Nismës për Kosovën Milaim Zeka ka deklaruar për “Zërin” se e ka tërhequr nënshkrimin nga nisma për shfuqizimin e Gjykatës Speciale dhe ka thënë se kjo gjykatë nuk duhet të shfuqizohet.(Shkrimin e plotë mund ta lexoni në numrin e sotëm të Gazetës Zëri si dhe në versionin Online me parapagim në online.zeri.info)