Apostolova ripërsërit se Kosova duhet ta luftojë korrupsionin e krimin e organizuar

Aktuale November 10, 2017 - 11:57

Përfaqësuesja e BE-së në Kosovë, Nataliya Apostolova ka lavdëruar përpjekjet e Qeverisë së Kosovës për të ecur përpara në Agjendën e Reformave Evropiane.

Por Apostolova ka përmendur edhe problemet e mëdha që ka Kosova duke shtuar se autoritetet vendore duhet të bëjnë më shumë në luftën kundër krimit të organizuar dhe korrupsionit, ashtu si edhe në ndërtimin e një gjyqësori të pavarur.

Apostolova që këto komente i ka bërë në konferencën “Agjenda për Reforma Evropiane: Raporti i progresit për qeverisjen e mirë dhe sundimin e ligjit” ka përmendur edhe çështjen e financimit të partive politike.

Ajo këtë e ka cilësuar ende si problem ashtu sikur edhe emërimet në organet e pavarura, njofton Klan Kosova.

Përfaqësuesja e BE-së ka lavdëruar vendimet e kryeministrit Haradinaj për shkarkimin e disa anëtarëve të bordeve që janë emëruar jashtëligjshëm por që sipas saj, ka ende shumë punë për tu bërë në këtë fushë.

Kryeministri i Kosovës, Ramush Haradinaj, kohë më parë ka marrë vendim për shkarkimin e disa anëtarëve të Bordeve të Drejtorëve të disa Ndërmarrjeve Publike.

Vendimi për shkarkimin e tyre kishte ardhur pas konstatimit të Agjencisë Kundër Korrupsionit se me rastin e emërimit të tyre është shkelur Ligji i Ndërmarrjeve Publike.

Apostolova ka përmendur edhe përmirësimin e domosdoshëm të administratës publike.