Tahiri, në prag të arrestimit: S’keni parë asgjë, akoma!

Ish-ministri i Brendshëm, Saimir Tahiri, ka komentuar shkurtimisht kërkesën e Prokurorisë së Krimeve të Rënda për heqjen e imunitetit të tij. “Nuk keni parë gjë akoma”, tha ai për gazetarët pas daljes nga banesa e tij.

Pas një hetimi dypalësh mes Shqipërisë dhe Italisë, Prokuroria e Krimeve të Rënda i kërkon Kuvendit autorizimin për heqjen e imunitetit të ish-ministrit të Brendshëm Saimir Tahiri, aktualisht deputet i Partisë Socialiste. Heqja e imunitetit nënkupton lënie dorë të lirë akuzës për të kërkuar në Gjykatën e Krimeve të Rënda arrestimin e ish-ministrit nga viti 2013 deri në marsin e 2017.

Prokuroria thotë se kjo kërkesë vjen në vijim të hetimit të nisur për veprat e trafikut të narkotikëve të kryer në bashkëpunim në formën e posaçme të grupit të strukturuar kriminal dhe korrupsionit pasiv të zyrtarëve të lartë shtetërore.

Burime të rezervuara i thanë Top Channel se në Tiranë kanë mbërritur mbrëmjen e të mërkurës, ose mëngjesin e të enjtes, dy dokumente të rëndësishme që si duket kanë vulosur kërkesën e prokurorisë ndaj Saimir Tahirit.