Aktuale

Lul Raka i tregon kryeministrit Haradinaj pse s’ka pranuar që arsimi i lartë në shëndetësi të duket si biznes qebaptoresh

Lul Raka i tregon kryeministrit Haradinaj pse s’ka pranuar që arsimi i lartë në shëndetësi të duket si biznes qebaptoresh
25 shtator 2017 • 23 : 23

Në adresë të kryeministrit Ramush Haradinaj është përcjellë një letër me përmbajtje shpjeguese e aspak ankuese.

Atë e ka shkruar Lul Raka, në cilësinë e një anëtari tashmë të shkarkuar të Bordit të Këshillit Shtetëror të Agjencisë Kosovare për Akreditim.

Raka i ka treguar Haradinajt se lajmi për shkarkimin e tij nuk e ka befasuar aspak, pasi ndjenjën e të shkarkuarit e kishte përjetuar edhe më herët kur në krye të MASHT-it ishte Ramë Buja.

Megjithatë, ai ka thënë se e ndjenë për obligim që ta sqaroj edhe për publikun atë që po ndodhë në sistemin arsimor, transmeton AktivPress.

Letrën e tij drejtuar kryeministrit mund ta lexoni në vijim!

I nderuar Kryeministër Z. Haradinaj,

Në vendimin e sotëm kishit kërkuar nga Ministri i Arsimit (kandidat për kryetar të Prishtinës) shkarkimin e tërë Bordit të Këshillit Shtetëror të Cilësisë në Agjencinë e Kosovës për Akreditim. Pasi që nuk është hera e parë që më ndodh shkarkimi i tillë,këtë lajm e mora me sportivitet.

Herën e parë, Ramë Buja, më pat shkarkuar vetëm mua. Preteksti i shkarkimit qenka “parregullsi serioze të agjencisë”. Si anëtar i Bordit dhe përfaqësues nga sektori i shëndetësisë dua t’i sqaroj opinionit publik disa nga këto “parregullsi serioze”:

1.Kam qenë kategorikisht dhe jam ende kundër hapjes së drejtimeve të mjekësisë së përgjithshme në cilindo institucion privat të arsimit të lartë të Kosovës. Rezonanca dhe UBT kanë aplikuar, por akreditimi i tyre është refuzuar nga Agjencia (me sygjerimin tim).

2.Kam qenë edhe kundër hapjes së drejtimeve të Stomatologjisë e Farmacisë, por votova “pro”, për shkak të numrit të kufizuar të studentëve të regjistruar.

Në mbledhjen e së premtes së shkuar këto institucione kërkuan rritjen e menjëhershme të numrit të studentëve.

-Kolegji AAB, kërkoi që në vend të 25 studentëve në Stomatologji t’i regjistrojë 120 sosh. Kurse, në Radiologji në vend të 30 studentëve t’i regjistrojë 120.

-Kolegji UBT kërkoi që në vend të kuotave të votuara në Farmaci prej 20 studentësh ta rrisë numrin në 50; në Stomatologji në vend të 20 studentëve në 50 dhe infermieri në vend të 50 studentëve të regjistrojë 300 studentë. Kam votuar kundër rritjes edhe për një student të vetëm.

3.Kolegji AAB vetëm në infermieri për një vit ka regjistruar mbi një mijë studentë! Rregullsi se jo mahi!

4.Në periudhën sa kam qenë në Agjenci janë mbyllur 140 programe në të gjitha institucionet publike e private në Kosovë.

5.Unë vazhdoj të jem i qetë për këto “parregullsi” që kam bërë dhe do të vazhdoj kurdo që kam mundësi me parregullsi të tilla, duke mos u pajtuar që arsimi i lartë në shëndetësi të duket si një biznes qebaptoresh. I nderuar Kryeministër. Kaq pata. Nuk kam aspak hatërmbetje.

Suksese në punë.

Lul Raka,

Kaçanik

© zëri.info