Vdekjet në QKUK dyshohet se erdhën nga gazi i prodhuar pa licencë në Kosovë

Aktuale September 13, 2017 - 18:31

Ministri i Shëndetësisë, Uran Ismaili, ka konfirmuar raportimet për dyshimet mbi gazin oksidol (N2O), si shkaku kryesor që çoi në vdekjen e pacientëve në QKUK.

Ismaili ka bërë të ditur se nuk bëhet fjalë për oksigjenin, por për oksidolin i cili është përdorur në disa salla të operacionit, për në dy prej tyre ka pasur komplikime, shkruan Gazeta Shneta.

“Pista kryesore është ky gaz. Inspektorët tanë kanë gjetur një kompani që nuk është e licenuar për këtë punë, kanë prodhuar këtë gaz pa licencë. Kompania ka licencë për import, por jo për prodhim”.

“Kam kërkuar nga QKUK-ja që të shpërndahet informacioni sepse ky gaz mund të shpërndahet edhe në spitale të tjera”, ka deklaruar Ismaili në televizionin publik.

Ai ka shtuar se kjo kompani është identifikuar dhe është ftuar edhe Policia e Kosovës në ndihmë.

“Kompania është identifikuar nga inspektorët tanë. E kemi thirrë edhe Policinë dhe është izoluar vendi dhe janë marr mostrat. Mund të jetë një pistë e dyshimit”, ka thënë Ismaili.