Aktuale

AAK: Listën Serbe nuk ua sollëm ne, atë e gjetëm në mesin tuaj

AAK: Listën Serbe nuk ua sollëm ne, atë e gjetëm në mesin tuaj
14 gusht 2017 • 13 : 03

Aleanca për Ardhmërinë e Kosovës, përmes një komunikate për media ka folur rreth pjesëmarrjes së Listës Serbe në institucionet e Kosovës.

Për këtë, ata kanë thënë se Lista Serbe duhet të jetë pjesë e institucioneve, pasi siç thonë ata, “kështu vetë e keni gatuar”.

Komunikata e plotë nga AAK:

“Listën Serbe“, nuk ua sollëm ne! Atë e gjetëm në mesin tuaj, dhe ju neokomunistët e këtij vendi, mos u thirrni në patriotizëm, sepse patriotizmi pa akte patriotike, që juve u kanë munguar gjithmonë, mund të jetë vetëm strehë horrash!

Përfaqësimi i serbëve kosovarë (në rastin kontekst Lista Serbe) në Institucionet e Republikës së Kosovës është kategori kushtetuese, dhe në çdo kombinim ata duhet të jenë pjesë e institucioneve, sepse kështu e keni gatuar vetë.

Kakarisjet e sotme në Kuvend, ishin një spektakël populizmi i një grupi jo-formal deputetësh, (në mesin e të cilëve edhe njerëz të akuzuar për terrorizëm), e jo debat parlamentar, sepse nuk mund të ketë debat në një seancë që nuk ka kuorum, madje kur seanca është konstituive, edhe në rast të kuorumit të plotë, nuk parashihet debati. Leni mbledhitë e kthejuni realitetit.

Ne po bëjmë të pamundurën që ta zhbllokojmë situatën e krijuar, duke krijuar parakushtet e realizimit të një të drejte kushtetuese, që është zgjedhja e kryetarit të Kuvendit, e që u pëlqeu apo jo deputetëve „neokomunistë“, ajo i përket grupimit më të madh politik në vend. Nuk e konsiderojmë se situata e krijuar mund të marrë zgjidhje, me fjalime propagandistike e kundërkushtetuese në një mbledhje pa kuorum të Kuvendit.

© zëri.info