Tahiri e quan Molliqajn kriminel ordiner, e akuzon për sulm me zollë në Kuvend
Abelard Tahiri, këshilltari politik dhe zëvendës-shefi i stafit të Presidentit të Kosovës, e ka cilësuar deputetin e Vetëvendosjes, Dardan Molliqajn, si kriminel ordiner dhe përgjegjës të dhunës së organizuar nga Vetëvendosje në vitet e fundit.
Tahiri, përmes një postimi në profilin e tij zyrtar në rrjetin social “Facebook”, ka akuzuar Molliqajn, për organizim të sulmit ndaj Kuvendit të Kosovës me zollë, vënie të bombës në RTK si dhe për raste të tjera.
Postimi i plotë i Tahirit:
Mendoj se vitet 2014-2017 kanë qenë vite të rënda për Kosovën.
Në këtë periudhë, kemi qenë dëshmitarë të një dhune të madhe të ushtruar nga opozita ndaj institucioneve. Kemi parë paaftësinë e institucioneve për të çuar përpara procese të rëndësishme, degradim të mëtutjeshëm të sistemit arsimor dhe shëndetësor, dhe në fund fare degradim dhe dalldisje totale të sistemit të drejtësisë.
Për këtë të fundit, shembulli më eklatant është ai i kriminelit ordiner, Dardan Molliqaj i Vetëvendosjes, i cili përkundër gjithë atyre krimeve që akuzohet se i ka bërë, së paku nga viti 2014 e deri më sot, ende sillet i lirë.
Ja disa prej krimeve për të cilat botërisht akuzohet ai:
1. Dardan Molliqaj është përgjegjës për organizimin e sulmit me zollë ndaj Kuvendit të Kosovës, akt ky terrorist dhe dhunim i sovranitetit të shtetit.
2. Dardan Molliqaj është përgjegjës për vënien e bombës në RTK.
3. Dardan Molliqaj është përgjegjës për organizimin e atentatit ndaj familjes së Drejtorit të RTK-së.
4. Dardan Molliqaj është përgjegjës për korrupsionin dhe shitjen e lejeve të ndërtimit nga Komuna e Prishtinës.
5. Dardan Molliqaj e di se në çfarë gjendje të rëndë është A.M. prej haraçit që ia ka vënë ai, mes tjerash, duke e detyruar që t’i paguajë edhe punëtorët e tij për të dalë në protestat e Vetëvendosjes.
Këto janë disa nga të bëmat e Dardan Molliqajt, nga shumë që fliten e përfliten, që dihen e nuk dihen. Mirëpo, edhe ai do ta ketë një fillim të ri. Krimeve të tij do t’u vijë fundi.
Të bëmat e tij, vetëm për këto tri vjet, në një vend me sistem funksional të drejtësisë, do t’ia mundësonin atij që një pjesë të mirë të jetës ta kalojë në burg.
#FillimiRi
