Thaçi: Anëtarësimi në BE dhe NATO nuk ka alternativë tjetër
Presidenti i Kosovës, Hashim Thaçi, ka thënë se Kosova është plotësisht e orientuar për t’u anëtarësuar në Bashkimin Europian dhe NATO.
Për këtë ai ka shkruar në Facebook se duhet vendosmëri dhe lidership për të shtyrë agjendën e anëtarësimit të shteteve të Ballkanit në këto dy institucione.
“Kurrë më shumë se tani ka nevojë për vendosmëri, guxim, vizion dhe lidership për të shtyrë agjendën e anëtarësimit të shteteve të Ballkanit në BE dhe NATO. Kosova është plotësisht e orientuar dhe me kohë ka pranuar dhe punon për të avancuar vlerat perëndimore civilizuese”, ka shkruar Thaçi.
“Prandaj, anëtarësimi i Kosovës në BE dhe NATO nuk ka asnjë alternativë tjetër”.
Presidenti i Republikës së Kosovës, Hashim Thaçi, ka marrë sot pjesë në Konferencën Ndërkombëtare, “Dubrovnik Forum, ku është folur për bashkëpunimin adriatiko-mesdhetar dhe sigurinë e vendeve të Evropës Juglindore.
Në prani të shumë përfaqësuesve nga shtete të ndryshme, presidenti Thaçi ka folur për tema të ndryshme nëpër të cilat po kalon Kosova dhe rajoni, njofton kumtesa, përcjell "Zeri.info".
Presidenti ka ritheksuar se Kosova, si shtet sovran, e ka edhe detyrim kushtetues ta formojë ushtrinë, e cila do të bëhet në partneritet me NATO-n.
Duke folur për dialogun për normalizimin e marrëdhënieve me Serbinë, presidenti ka thënë se është zotim i Kosovës ta vazhdojë atë drejt normalizimit të marrëdhënieve.
“Jemi të vetëdijshëm se kemi ardhur në një pikë, në një proces të ri, i cili duhet të përfundojë me normalizimin e plotë të marrëdhënieve mes Kosovës dhe Serbisë“, ka theksuar ai.
Duke folur për zhvillimet politike në shtetet e Ballkanit Perëndimor, presidenti Thaçi ka thënë se pas disa muajsh mjegulle politike, gjendja në Evropën Juglindore po qartësohet.
“Qeveritë e orientimit të qartë pro Bashkimit Evropian po marrin pushtetin në shumicën e shteteve të Evropës Juglindore.
Derisa, në BE ka shenja se politikat e integrimit evropian sërish po triumfojnë”, ka theksuar ai.
Presidenti ka shtuar se kjo është arsyeja pse është e rëndësishme që të kemi këto forume rajonale, ku mund të diskutojmë zhvillimet në shtetet tona.
Ai ka thënë se nëse ne jemi të ngadaltë në proceset integruese dhe në bashkëpunim, kjo nuk ka të bëjë me mungesë të mekanizmave që i promovojnë ato.
“Por, kjo ka të bëjë më shumë me mungesën e guximit, vizionit dhe lidershipit. Lidershipi dhe vizioni - për të kuptuar se ne duhet të shikojmë njëri-tjetrin jo si armiq, por si partnerë dhe si shans”, ka thënë ai.
