Kurti fton LAA-në e deputetët e ‘PAN’-it për të udhëhequr vendin (VIDEO)
Kandidati për kryeministër nga radhët e Lëvizjes Vetëvendosje, Albin Kurti i bindur në fitoren e tij, ka ftuar të gjithë partitë dhe deputetët që ti bashkohen Lëvizjes Vetëvendosje në formimin e Qeverisë, raporton “Zeri.info”.
“Ne ftojmë të gjithë koalicionin LDK-AKR -Alternativa dhe po ashtu deputetët të koalicionit PDK -AAK -NISMA, ti bashkohen lëvizjes në formimin e qeverisë”, ka thënë Kurti duke theksuar se ditëve në vijim do të shpeshtohen takimet me partitë dhe deputetët në vend.
“Qytetarët kanë krijuar një situatë krejtësisht ndryshe politike. Dy koalicionet kanë pësuar humbje të thella. Në këto kushte ne deklarojmë se jemi të gatshëm të formojmë qeverinë”, ka shtuar Kurti, i cili beson se vullnetin e popullit nuk mund ta ndalë askush madje as presidenti Thaçi, raporton “Zeri.info”.
Ndryshe, Kurti nuk i përjashton nga lista e bashkëpunimit as subjektet serbe.
"Së pari ne i respektojmë pakicat ne kemi paralajmëruar dialog me ta për zhvillim të hovshëm e demokratik. Së treti ne do ti përfshijmë edhe pakicat në qeverinë tonë të re, kjo është nevojë e vendit tonë dhe obligim kushtetues dhe ligjor. Ndërkaq, ne nuk bëjmë pazare të tilla për pozita që ta deformojmë vullnetin e popullit", ka thënë Kurti./ZËRI/
