Haradinaj: Unë kam qenë luftëtar lirie, jo pushtues e vrasës si Daçiqi e shefi i tij Millosheviqi

Aktuale February 12, 2017 - 19:21

Ramush Haradinaj iu është kundërpërgjigjur akuzave të ministrit të jashtëm serb, Ivica Daçiq i cili e kishte quajtur 'kriminel', liderin e AAK-së.

Ai me anë të një postimi në facebook ka deklaruar se ka qenë luftëtar lirie, e jo një pushtues e vrasës si Daçiq dhe shefi i tij.

LEXO EDHE: Daçiq vazhdon fushatën kundër Haradinajt: Ai për ne mbetet një kriminel lufte

‘‘Ivica Daçiq, ka hapur luftë personale me mua, që e kam mbrojtur shtëpinë e popullin tim dhe po i harron krimet që i ka kryer vet e shokët e tij edhe në gra e në fëmijë. Unë kam qenë luftëtar lirie e jo pushtues e vrasës si ai e shefi i tij!“, ka shkruar Ramush Haradinaj në profilin e tij zyrtar në rrjetin social "Facebook".

Postimi i plotë i Haradinajt:

Kur të vërsulet krimineli!

Ivica Daçiq, ka hapur luftë personale me mua, që e kam mbrojtur shtëpinë e popullin tim dhe po i harron krimet që i ka kryer vet e shokët e tij edhe në gra e në fëmijë.

Unë kam qenë luftëtar lirie e jo pushtues e vrasës si ai e shefi i tij!

Pavarësisht se kam bërë luftë mbrojtjëse e në përputhje me ligjet ndërkombëtare të luftës, unë i jam përgjigjur drejtësisë ndërkombëtare, e nuk jam fshehur si ai qindra zyrtarë të tjerë serbë, të cilët bashkë me Daçiqin, i kanë zhdukur dëshmitë e krimeve të kryera në Kosovë!

Daçiqi duhet të flasë për krimet e tij e të shokëve të tij, e të mos kujtoj që i shlyen krimet e veta duke shpifur ndaj meje!

Unë kurrë nuk jam shqetësuar kur më janë vërsulur kriminelë të tipit të tij, as në 98-99 e as sot!

Ai duhet të shqetësohet për krimet e veta, sepse unë kam dalë i pastër si loti!

Hala nuk është vonë që drejtësia ndërkombëtare ta shohë e ta gjykojë jetën kriminale të Ivica Daçiqit dhe jo vetëm!

Image