Nitaj jep versionin e AAK-së, përse dështoi dakordimi për deklaratën
“Është për keqardhje se si një deklaratë e dakorduar, pothuaj deri në detaje, sabotohet e nuk nënshkruhet në momentin e fundit”, shkruan Nitaj.
Sipas tij, megjithëse partitë opozitare kishin bërë të pamundurën në harmonizimin e një deklarate të përbashkët, duke u treguar bashkëpunuese e duke pranuar një dokument që nuk paragjykon rezultatin e zgjidhjes së çështjes së demarkacionit, ishte pzita sot që i është kthyer edhe njëherë këngës së vjetër “për ta lavdëruar” marrëveshjen e vet me të cilën e ka futur vendin në telashe.
“Krejt çka është kërkuar nga AAK dhe kryetari i saj Haradinaj, ka qenë që fjalës shqyrtim t’i shtoheshin dy germa (ri), kjo në frymën e përmbajtjes së dokumentit, sepse e gjithë fryma e tekstit të deklaratës, ka qenë rishikimi i një procesi, pa e paragjykuar rezultatin”.
“Kjo është deklarata që nuk është pranuar nga dy partnerët e Qeverisë së Koalicionit”, deklaron Nitaj.
Për më tepër, ai publikon edhe deklaratën për të cilën ende partitë nuk janë dakorduar.
Republika e Kosovës
Deklarata
Në frymën e dialogut të brendshëm politik dhe me qëllim të zhvillimit dhe konsolidimit demokratik, forcimit të institucioneve te Kosovës, avancimit të integrimeve euroatlantike dhe ruajtjes e kultivimit të marrëdhënieve me të gjithë partnerët rajonalë e ndërkombëtarë.
Subjektet politike parlamentare, Partia Demokratike e Kosovës (PDK), Lidhja Demokratike e Kosovës (LDK), Lëvizja VETËVENDOSJE!, Aleanca për Ardhmërinë e Kosovës (AAK) dhe Nisma për Kosovën (NISMA), zotohen se do të punojnë së bashku për gjetjen e zgjidhjes për demarkacionin me Malin e Zi.
Subjeket politike parlamentare do të punojnë së bashku me qëllimin e arritjes së koncensusit në qështjen e demarkacionit me Malin e Zi. Palët nuk ndërmarrin veprime për këtë çështje, për sa kohë që dialogu vazhdon.
Subjektet pajtohen që (ri)shqyrtimi i Marrëveshjes për Demarkacionin e Kufirit me Malin e Zi, të jetë në përputhje me integritetin territorial dhe ligjet e Kosovës, interesat dhe proceset integruese te vendit, dhe parimin e respektimit reciprok mes Republikës së Kosovës dhe të Malit të Zi për fqinjësi të mirë dhe partneritet, si dhe parimin e së drejtës ndërkombëtare.
Subjektet pajtojen të punojnë së bashku në frymën e vullnetit të mirë, derisa hollësitë (mekanizmat) për zgjidhjen e çështjes së demarkacionit do të përpunohen brenda pak ditësh. Ftojmë edhe subjektet e tjera për bashkëpunim.
