KPK-ja lanson programin “Gjithëpërfshirja në edukimin fizik”

Moment historik për sportin e paralimpizmit. Komiteti Paralimpik i Kosovës (KPK) në mbështetje të Ministria e Kulturës, Rinisë dhe Sportit, ka lansuar programin “Gjithëpërfshirja në Edukimin Fizik”, të parin ndonjëherë për nxënësit me aftësi të kufizuara, njofton Komiteti Paralimpik i Kosovës, përcjell “Zëri”.

Programi është akredituar nga Ministria e Arsimit, Shkencës, Teknologjisë dhe Inovacionit (MASHTI).

Lansimi i programit u bë në Shkollën e Mesme të Ulët “Ibrahim Mazreku” në Malishevë, në prani të trajnerëve dhe mësimdhënësve.

Programi ka për qëllim promovimin e paralimpizmit dhe gjithëpërfshirjen e personave me aftësi të kufizuara në aktivitete të edukimit fizik në shkolla, ndërsa kontribuon edhe në parimin gjithëpërfshirës të arsimit në Kosovë.

Për zbatimin e programit janë angazhuar tre trajnerë të kualifikuar, të cilët në fillim do të punojnë me 20 mësimdhënës, ndërsa numri i tyre do të rritet.

Nënpresidenti i KPK-së, Daut Tishuki, njëherit menaxher i programit, duke falënderuar MKRS-në për mbështetjen dhe MASHTI-in për akreditimin, e quajti moment historik lansimin e programit, derisa shtoi se përfituesit më të mëdhenj do të jenë personat me aftësi të kufizuara dhe mësimdhënësit, të cilët njohuritë që do t’i marrin do t’i zbatojnë tek kjo shoqëri.

Programi do të shtrihet edhe në të gjitha qendrat e Kosovës, ndërsa në muajin qershor parashihet të lansohet në Prishtinë. /Zëri